କେଜରିୱାଲ, ସିଶୋଦିଆ ଦୋଷମୁକ୍ତ:ଦିଲ୍ଲୀ ଅବକାରୀ ନୀତି ଅନିୟମିତତା ମାମଲାରେ କୋର୍ଟଙ୍କ ବଡ଼ ରାୟ,ପ୍ରମାଣ ଦେବାରେ ସିବିଆଇ ବିଫଳ

ନୂଆଦିଲ୍ଲୀ: ଦିଲ୍ଲୀର ବହୁ ଚର୍ଚ୍ଚିତ ଅବକାରୀ ନୀତି ଦୁର୍ନୀତି ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟୀର ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ବଡ଼ ଆଶ୍ୱସ୍ତି ମିଳିଛି । ଦିଲ୍ଲୀ ରାଉଜ୍ ଏଭିନ୍ୟୁ କୋର୍ଟ ପୂର୍ବତନ ମୁଖ୍ୟମନ୍ତ୍ରୀ କେଜ୍ରିୱାଲ ଓ ପୂର୍ବତନ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ ସମେତ ସମସ୍ତ ୨୩ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି । ଏହା ସହିତ ସିବିଆଇକୁ କଡ଼ା ଭର୍ତ୍ସନା କରିଛନ୍ତି କୋର୍ଟ। କହିଛନ୍ତି ପ୍ରମାଣ ଦେବାରେ ସିବିଆଇ ଫେଲ ମାରିଛି।ସିବିଆଇ ପାଖରେ ମାମଲାକୁ ଚଳାଇବାକୁ ପର୍ଯ୍ୟାପ୍ତ ସାକ୍ଷ୍ୟ କିମ୍ବା ପ୍ରମାଣ ନାହିଁ । ତେଣୁ କୋର୍ଟ ଏହି ମାମଲାକୁ ଖାରଜ କରିବା ସହିତ ସମସ୍ତ ୨୩ ଅଭିଯୁକ୍ତ ଦୋଷମୁକ୍ତ ଘୋଷଣା କରିଛନ୍ତି ।

ତେବେ ଅଦାଲତଙ୍କ ନିଷ୍ପତ୍ତି ଆସିବା ପରେ ଅରବିନ୍ଦ କେଜ୍ରିୱାଲ ବେଶ ଭାବବିହ୍ୱଳ ହୋଇପଡ଼ିଥିଲେ । କେଜ୍ରିୱାଲ ଗଣମାଧ୍ୟମକୁ ପ୍ରତିକ୍ରିୟା ଦେଉଥିବା ସମୟରେ କାନ୍ଦି ପକାଇଥିଲେ । ଆଉ କାନ୍ଦି କାନ୍ଦି କହିଥିଲେ “ମୁଁ ଦୁର୍ନୀତି କରିନାହିଁ । କେଜ୍ରିୱାଲ ଦୁର୍ନୀତିଗ୍ରସ୍ତ ନୁହେଁ । ମୁଁ ସଚ୍ଚୋଟତାର ସହିତ କାମ କରିଛି”। ତାଙ୍କ ପାଖରେ ଉପସ୍ଥିତ ଥିବା ମନୀଷ ସିସୋଦିଆ ଆଲିଙ୍ଗନ କରି ସାନ୍ତ୍ୱନା ମଧ୍ୟ ଦେଇଥିଲେ ।