ଆସାମ ବିଧାନସଭାରେ ‘ୟୁସିସି’ ବିଲ୍ ପାସ୍: ଉତ୍ତରାଖଣ୍ଡ ଓ ଗୁଜରାଟ ପରେ ତୃତୀୟ ରାଜ୍ୟ ଭାବେ ୟୁସିସି’ ବିଲ୍ ପାସ

ଗୌହାଟି:ଦେଶରେ ସମାନ ଆଇନ ବ୍ୟବସ୍ଥା ଦିଗରେ ଏକ ବଡ଼ ପଦକ୍ଷେପ ସ୍ୱରୂପ ବୁଧବାର ଆସାମ ବିଧାନସଭାରେ ଐତିହାସିକ ”ୟୁନିଫର୍ମ ସିଭିଲ୍ କୋଡ୍” (ୟୁସିସି) ବା ସମାନ ନାଗରିକ ସଂହିତା ବିଲ୍ ସଫଳତାର ସହ ପାସ୍ ହୋଇଯାଇଛି। ଉତ୍ତରାଖଣ୍ଡ ଓ ଗୁଜରାଟ ପରେ ଏହି ଗୁରୁତ୍ୱପୂର୍ଣ୍ଣ ଆଇନକୁ ମଞ୍ଜୁରୀ ଦେବାରେ ଆସାମ ଦେଶର ତୃତୀୟ ରାଜ୍ୟ ପାଲଟିଛି। ଚାଲୁ ରହିଥିବା ପାଞ୍ଚ ଦିନିଆ ବିଧାନସଭା ଅଧିବେଶନର ଶେଷ ଦିନରେ ଏହି ବିବାଦୀୟ ବିଲ୍ ଉପରେ ବ୍ୟାପକ ଆଲୋଚନା କରାଯାଇଥିଲା।

କଂଗ୍ରେସ, ରାଇଜୋର ଦଳ ଓ ତୃଣମୂଳ କଂଗ୍ରେସ (ଟିଏମସି) ଭଳି ପ୍ରମୁଖ ବିରୋଧୀ ଦଳଗୁଡ଼ିକ ଏହି ଆଇନକୁ ସିଲେକ୍ଟ କମିଟି ନିକଟକୁ ପଠାଇବା ସହ ଅଧିକ ସମୀକ୍ଷା ପାଇଁ ଦାବି କରିଥିଲେ ହେଁ, ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ନେତୃତ୍ୱାଧୀନ ବିଜେପି ସରକାର ଏହାକୁ ଗୃହରେ ଗୃହୀତ କରାଇଛନ୍ତି। ଯଦିଓ ଏହି ଆଇନ ଆସାମରେ ବସବାସ କରୁଥିବା କୌଣସି ଅନୁସୂଚିତ ଜନଜାତି (ଏସଟି) ବା ଆଦିବାସୀ ସମ୍ପ୍ରଦାୟ ପାଇଁ ଲାଗୁ ହେବ ନାହିଁ ବୋଲି ସ୍ପଷ୍ଟ କରାଯାଇଛି।ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ବିଲର ଉଦ୍ଦେଶ୍ୟ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ଏହି କୋଡର ମୁଖ୍ୟ ଲକ୍ଷ୍ୟ ହେଉଛି ବିବାହ, ଛାଡ଼ପତ୍ର, ସମ୍ପତ୍ତି ଉତ୍ତରାଧିକାର ଓ ଲିଭ୍-ଇନ୍ ସମ୍ପର୍କ ସହିତ ଜଡ଼ିତ ବ୍ୟକ୍ତିଗତ ନିୟମଗୁଡ଼ିକୁ ଏକତ୍ରିତ ଓ ସରଳ କରିବା।