୨ ସପ୍ତାହ ଯାଏଁ ଶୀତରୁ ନାହିଁ ନିସ୍ତାର: ଆହୁରି ଥରିବ ଓଡ଼ିଶା, ଉପକୂଳରୁ ଉପାନ୍ତ ସବୁଠି ଅସହ୍ୟ ଥଣ୍ଡା 

ଭୁବନେଶ୍ୱର: ଆଗାମୀ ଦୁଇ ସପ୍ତାହ ଯାଏଁ ଶୀତରୁ ନାହିଁ ନିସ୍ତାର। ଏବେ ଯେତିକି ଥଣ୍ଡା ଅନୁଭୂତ ହେଉଛି, ତାଠୁ ଅଧିକ ଶୀତ ଅନୁଭୂତ ହେବ।ସାରା ରାଜ୍ୟରେ ଅସମ୍ଭାଳ ଥଣ୍ଡା । ଉପକୂଳରୁ ଉପାନ୍ତ ସବୁଠି ଶୀତ ଲହରୀ ଅନୁଭୂତ ହେଉଛି । ସକାଳୁ କୁହୁଡ଼ି ସାଙ୍ଗକୁ ଶୀତୁଆ ପବନ ଜନଜୀବନକୁ ଅସ୍ତବ୍ୟସ୍ତ କରୁଛି । ୨୪ ସହରରେ ରାତି ତାପମାତ୍ରା ୧୦ କିମ୍ବା ତାଠୁ କମ୍‌ ଥିଲା। ଜି. ଉଦୟଗିରି ରାତି ତାପମାତ୍ରା ୨.୫ ଡିଗ୍ରୀକୁ ଖସିଥିଲା। ଭୁବନେଶ୍ବର ତାପମାତ୍ରା ମଧ୍ୟ ୯.୪କୁ କମି ଆସିଥିବା ସୂଚନା ମିଳିଛି।

ରାଜଧାନୀରେ ବାଘୁଆ ଶୀତ ଅନୁଭୂତ ହେଉଛି । ସକାଳ ୫ଟା ୩୦ ମିନିଟ ସମୟରେ ୧୦ ଡିଗ୍ରୀକୁ ଖସି ଆସିଥିଲା ରାତିର ତାପମାତ୍ରା । ସନ୍ଧ୍ୟାପରେ ଥଣ୍ଡାରେ ଥରୁଥିଲା ଭୁବନେଶ୍ୱର । ଭୁବନେଶ୍ୱରରେ ଚଳିତ ବର୍ଷର ଏହା ରେକର୍ଡ ତାପମାତ୍ରା । ଜାନୁଆରି ୪ ତାରିଖରେ ୧.୬ ଡିଗ୍ରୀ, ଜାନୁଆରି ୫ ତାରିଖରେ ୧୮ ଡିଗ୍ରୀ, ୬ ତାରିଖରେ ୧୫.୪ ଡିଗ୍ରୀ, ୭ ତାରିଖରେ ୧୧.୪ ଡିଗ୍ରୀ ଓ ଆଜି ୧୦.୮ ଡିଗ୍ରୀ ରେକର୍ଡ ହୋଇଛି । ସେପଟେ କଟକରେ ରାତିର ତାପମାତ୍ରା ୯.୬ ଡିଗ୍ରୀ ରେକର୍ଡ ହୋଇଛି ।