ଟ୍ରମ୍ପଙ୍କୁ ଇରାନର ଖୋଲା ଧମକ:ପୁଣି ଘନେଇଲା ମହାଯୁଦ୍ଧ, ଶାନ୍ତି ଆଲୋଚନା ବିଫଳ ପରେ ମଧ୍ଯପ୍ରାଚ୍ୟରେ ନୂଆ ମୋଡ଼

ନୂଆଦିଲ୍ଲୀ:ଆମେରିକା ଏବଂ ଇରାନ ମଧ୍ୟରେ ବଢ଼ୁଥିବା ଉତ୍ତେଜନା ଏକ ନୂତନ ଏବଂ ଗମ୍ଭୀର ମୋଡ଼ ନେଇଛି। ଆମେରିକା ଇରାନର ଉପସାଗରୀୟ ବନ୍ଦରଗୁଡ଼ିକର ନୌସେନା ଅବରୋଧ ଘୋଷଣା କରିଛି। ଆମେରିକା ସେନା ଘୋଷଣା କରିଛି ଯେ ଏହା ଜାହାଜଗୁଡ଼ିକୁ ଇରାନ ବନ୍ଦରଗୁଡ଼ିକରେ ପ୍ରବେଶ କିମ୍ବା ପ୍ରସ୍ଥାନ କରିବାରୁ ବାରଣ କରିବ। ଯୁଦ୍ଧବିରତି ଆଲୋଚନା ବିଫଳ ହେବା ପରେ ତେହରାନ ଉପରେ ଚାପ ବୃଦ୍ଧି କରିବା ପାଇଁ ଏହି ପଦକ୍ଷେପ ନିଆଯାଇଛି। ଇରାନ ଚେତାବନୀ ଦେଇଛି ଯେ ଯଦି ଏହାର ନିଜସ୍ବ ବନ୍ଦରଗୁଡ଼ିକ ବିପଦରେ ପଡ଼ିଥାଏ, ତେବେ ପାରସ୍ୟ ଉପସାଗର କିମ୍ବା ଓମାନ ସାଗରରେ କୌଣସି ବନ୍ଦର ସୁରକ୍ଷିତ ରହିବ ନାହିଁ।

ହର୍ମୁଜ୍ ପ୍ରଣାଳୀ ଉପରେ ପ୍ରତିବନ୍ଧକ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍‌ଡ ଟ୍ରମ୍ପ । କୌଣସି ଜାହାଜକୁ ହର୍ମୁଜରେ ପ୍ରବେଶ କରିବାକୁ କିମ୍ୱା ସେଠାରୁ ବାହାରିବାକୁ ଅନୁମତି ଦେବୁ ନାହିଁ । ଟ୍ରମ୍ପ୍‌ ଏହା ସୋସିଆଲ ମିଡିଆରେ ଲେଖିବା ପରେ ପୁଣି ଥରେ ସାରା ବିଶ୍ୱରେ ଚିନ୍ତା ପ୍ରକାଶ ପାଇଛି । ହର୍ମୁଜ ଦେଇ ଭାରତ ସମେତ କେତେକ ଦେଶର ଜାହାଜ ଚଳାଚଳ ପାଇଁ ଅନୁମତି ଦେଇଥିଲା ଇରାନ୍ । ଦୈନିକ ୧୫ଟି ଜାହାଜ ଛାଡ଼ିବାକୁ ଘୋଷଣା କରିଥିଲା । ହେଲେ ଟ୍ରମ୍ପଙ୍କ ଧମକ ପରେ, ଶକ୍ତି ସଂକଟ ଆହୁରି ଘନେଇପାରେ ବୋଲି ଆଶଙ୍କା ପ୍ରକାଶ ପାଇଛି ।