ଜାପାନରେ ରେକର୍ଡ ଭାଙ୍ଗିଲା ତାତି: ତାପମାତ୍ରା ୪୦ ଡିଗ୍ରି ସେଲସିୟସ ଟପିଲା

ବ୍ୟୁରୋ: ପ୍ରବଳ ତାତି ଏବଂ ଗ୍ରୀଷ୍ମ ପ୍ରବାହଜାପାନରେ ଜୀବନଯାତ୍ରାକୁ ଅସ୍ତବ୍ୟସ୍ତ କରିଛି। ମଙ୍ଗଳବାର, ୨୧ ଜୁଲାଇରେ ଦେଶର ଅନେକ ସ୍ଥାନରେ ତାପମାତ୍ରା ୪୦ ଡିଗ୍ରି ସେଲସିୟସ ଅତିକ୍ରମ କରିଥିଲା। ଏହାକୁ ଦୃଷ୍ଟିରେ ରଖି, ଜାପାନ ପାଣିପାଗ ସଂସ୍ଥା (ଜେଏମଏ)ଦେଶର ପ୍ରଥମ ‘କୋକୁଶୋବି’ ଆନୁଷ୍ଠାନିକ ଭାବରେ ରେକର୍ଡ କରିଛି, ଯାହାର ଅର୍ଥ ‘ପୀଡ଼ାଦାୟକ ଗ୍ରୀଷ୍ମ ଦିନ’। ଏହି ନୂତନ ଶବ୍ଦଟି ଚଳିତ ବର୍ଷ ଏପ୍ରିଲରେ ସେହି ଦିନ ପାଇଁ ପ୍ରଚଳନ କରାଯାଇଥିଲା ଯେତେବେଳେ ତାପମାତ୍ରା ୪୦ ଡିଗ୍ରି ସେଲସିୟସ ଅତିକ୍ରମ କରିବ। ଗିଫୁ ପ୍ରିଫେକ୍ଚରର ଗୁଜିୟୋ ଏବଂ ତାଜିମି ସହର ଏବଂ ମଧ୍ୟ ଜାପାନର ଆଇଚି ପ୍ରିଫେକ୍ଚରର ଟୟୋଟା ସିଟିରେ ପାରଦ ୪୦ ଡିଗ୍ରି ସେଲସିୟସରେ ପହଞ୍ଚିଥିଲା। ବିଶେଷକରି, ଗୁଜିୟୋରେ ୪୦ ଡିଗ୍ରି ଏବଂ ଟୟୋଟାରେ ୪୦.୧ ଡିଗ୍ରି ତାପମାତ୍ରା ରେକର୍ଡ କରାଯାଇଥିଲା। ଦେଶର ୯୧୪ଟି ପାଣିପାଗ କେନ୍ଦ୍ର ମଧ୍ୟରୁ ୨୭୮ଟି କେନ୍ଦ୍ରରେ ତାପମାତ୍ରା ୩୫ ଡିଗ୍ରି ସେଲସିୟସ ଉପରେ ରେକର୍ଡ କରାଯାଇଛି। ଏହାକୁ ‘ମୋଶୋବି’ ବା ଅତ୍ୟନ୍ତ ଗରମ ଦିନ କୁହାଯାଇଛି।

ଇତିମଧ୍ୟରେ ପ୍ରବଳ ଗରମ ଜୀବନ ନେବା ଆରମ୍ଭ କରିଛି। ସୋମବାର ଦିନ, ନିଗାତା ପ୍ରଦେଶର ସାଞ୍ଜୋରେ ଜଣେ ୪୦ ବର୍ଷୀୟ ବ୍ୟକ୍ତି ରାସ୍ତାରେ ମୃତ ଅବସ୍ଥାରେ ମିଳିଥିଲେ। କାନାଗାୱାରେ ଜଣେ ୭୦ ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ପ୍ରାଥମିକ ତଦନ୍ତରୁ ଜଣାପଡିଛି ଯେ, ଉଭୟଙ୍କ ମୃତ୍ୟୁର କାରଣ ଅତ୍ୟଧିକ ତାତି ଏବଂ ଗ୍ରୀଷ୍ମ ପ୍ରବାହ। ସରକାରୀ ପରିସଂଖ୍ୟାନ ଅନୁଯାୟୀ, ୨୦୨୪ ମସିହାରେ ପ୍ରଥମ ଥର ପାଇଁ ଅଂଶୁଘାତ ଯୋଗୁଁ ମୃତ୍ୟୁ ସଂଖ୍ୟା ୨ ହଜାର ଅତିକ୍ରମ କରିଥିଲା।